成日話成年人應該每日有八小時睡眠，呢個說法原來對好多人來說都十分奢侈。病人，孕婦，甚至大部分的媽咪，都無咩機會可以有連續八小時的優質睡眠 (對上一次可以睡八小時，應該已經追溯到起碼四年前)。

既然未必所有人都有機會睡到8小時, 那更加要珍惜睡眠質素. 要瞓得好，心理、生理，同外在環境因素都重要。

根據國家睡眠組織 (National Sleep Foundation) 建議，以下幾個tips 有助改善睡眠質素：

．定時睡眠 – 習慣差不多時間上床睡覺和起床，就算第二日不用上班或放緊假都不要將睡眠和起床時間推得太遲，以免影響生理時鐘。

．睡前放鬆 – 細個成日俾家長話唔好玩得咁癲，如果唔係夜晚發惡夢（我依家都係咁同我囡講）。唔止小朋友, 大人都係 – 最好睡前有固定步驟要做，放鬆心情，避免睡前太緊張，太興奮，情緒太波動。

．避免午睡 – 飯後睡一睡，除了影響消化，更會影響晚上的睡眠質素。如果食飽飯覺得特別眼瞓，並非因為睡得不夠， 絕大機會是因為你體內的GI (升血糖指數) 值太高。你需要落街散步，而非小睡片刻。

．每天運動 – 運動有一百樣好處，當然包括製造快樂荷爾蒙，令人放鬆心情, 容易入睡. 不過做運動都有分時間：早上最好做帶氧運動，如跑步；中午最好做負重運動； 晚上最好做放鬆運動如拉筋，瑜伽等。

．Set好間房 – 房間大小並非最關鍵、 反而是溫度、 光暗、 聲音更重要。組織建議，最佳的房間溫度大約是16-20度。 冬天蓋被暖笠笠，一定好瞓過夏天熱辣辣，黐立立的感覺。 另外， 最好當然是可以保持清淨，黑暗的睡眠環境 – 需要道具可以包括黑色窗簾、 抽濕機、冷氣、 眼罩、耳塞等。

．揾個好枕頭 – 枕頭，床墊都無可能用一世， 一般最多9-10年已經要替換。

．最後，將睡眠的重要性再排高一些 ─ 很多人會知道睡眠重要， 但又不重視： 有節目， 有工作要趕，甚至簡單到可能想睇埋套電視劇， 或有其他更重要的事情, 往往就會犧牲睡眠時間. 所以排先後次序, 睡眠其實真係好重要好重要好重要。

Annie Lee－香港營養師學會 (HKNS) 認可營養師 

家有三寶, 一囡和一對龍鳳胎

任職營養師主管多年, 生Bsss後轉為私人執業營養師. 

身兼多職, 撰寫多個健康專欄, 舉辦健康講座, 為人客提供飲食營養建議,喜歡分享貼地的母嬰和育兒的經驗及營養資訊.

Facebook Page: https://www.facebook.com/AnnieLeeDiet/

更多營養師 Annie Lee的Blog：http://bit.ly/2v3H7zR