Facebook 有一樣好處，就係會提醒你當年今日發生過咩事！舊年4月好梳肝咁去咗法國半個月，巴黎就唔洗多講，仲有從未去過嘅北部聖米歇爾山、摩納哥、南部尼斯、同一個响附近，中文名叫濱海自由城（法文名：Villefranche-sur-Mer）嘅地方，一個我覺得幾偏門但又值得去嘅地點！
同尼斯相比之下，佢冇一個又長又大嘅無盡海岸，只係一個小小海灣！泊岸有小遊艇，但係個人反而感受到佢嘅悠閒，實在好喜歡！由於車站喺山腰，一到站行出去，已經可以响半山望到山下風景，當時我眼中只有海邊嘅餐廳！
之後沿住山，一邊睇風景，一邊行落山，大約1個鐘就到咗我要Hea嘅地方喇！行咗咁耐，拿拿聲坐低食吓嘢先！本身揀左海邊其中一間超有feel餐廳，但可惜冇生蠔。咁唯有作出取捨，坐喺對面欣賞到手風琴表演嘅位置，食完先再過去海邊坐吓！不過邊聽音樂邊食海鮮都幾爽吖！
除左生蠔係每日必點item之外，久唔久都會再叫其他唔同類型海鮮試吓！今日我指住海鮮區話想要蜆，大隻嗰款！可能人有錯手嘅關係，當盤生蠔一到，係就係見到上邊有蜆，不過唔係大蜆，只係類似港式豉椒炒蜆嗰款嘅細蜆咋喎。再睇真啲，係喇冇錯！唔知仲以為自己去咗掘蜆，之後即食刺身呀！好笑之餘心裡面都有暗暗鬧爆佢，不過算啦！既然都開咗，費事換過又可能會浪費，咁不如食咗佢！就喺扁晒嘴嘅情況下放入口之際，原來蜆不可貌相，對唔住係我錯！雖然蜆仔細細，但鮮味直湧而上，肉質爽口，我所有味蕾都比鮮甜味覆蓋住呀！即刻覺得連Cherry stone都要行埋一邊，最後忍唔住再Encore多一盤！
閱讀更多Swank's Blog：http://bit.ly/2nlDDJm
