農曆新年過後屋企花膠存貨已經清光光，所以即刻去幫襯左20幾年相熟嘅伯伯入返D貨看門口先！由於從小南區長大，所以好少幫襯大型海味店，因為心知就係羊毛出自羊身上，唔少廣告費包含消費者身上！所以我喜歡選擇水上人自家生曬小檔舖，認為比較貨真價實！香港仔、鴨脷洲出名就係海鮮、蝦米、花膠之類嘅乾貨！好開心可以同大家分享一下咁多年買花膠心得！

色澤清澈

揀花膠我唔會揀顏色太深太混濁，我心目中理想花膠係要向燈光下照出半透明，色澤黃而透亮。因為坊間實在太多假貨，真正嘅花膠顏色一定唔會係完全均勻、亦唔會成隻雪白色，而且必定有天然不規則紋路、有不均勻深淺琥珀色反而係未經過漂白加工嘅上等貨色！

不可帶血

正常買花膠係會檢查有冇某啲位置突然間深色，深色就是血水血絲！盡量避免揀有瘀血花膠。花膠身上帶深黑色嘅就係瘀血，通常係曬之前清洗唔乾淨，所以留下血迹，由於花膠內藏瘀血，浸發時會散發腥味，好難處理！

厚薄之分

花膠可分為「公」同「乸」，浸發後花膠公較結實，烹調時受熱都唔會容易溶化；相反花膠乸烹調時較易溶化流失膠質在餸菜或湯內，而且口感軟林淋，無公膠咁實淨。價錢方面花膠公比乸貴。坊間流傳有一種講法，厚身就係一定係好嘢貴嘢，但如果係花膠公呢？咁就薄都可以係靚嘢la，所以人地話薄就唔係好嘢！個人覺得都未必係完全正確嘅！

希望小小知識可以幫到大家下次買花膠時更得心應手la!

Facebook: 慢活、教煮

閱讀更多Swank's Blog：http://bit.ly/2nlDDJm