唯妹就嚟出世，又係時候要入貨。睇返買過俾唯b嘅用品，同埋集合呢幾年聽嘅評語，個人認為有幾樣產品係可以唔使買嘅，同大家分享一下
1. 放大鏡指甲鉗
陪月姨姨、我同唯爸都一致認為個放大鏡喺度係阻住嘅，放到咁大其實好難睇，比冇放大鏡仲危險啲。所以我哋由唯b初生已棄用，改用嬰兒剪刀，冇咁利，剪住隻迷你手指甲仔，新手爸媽都易控制啲。
2. 濕紙巾加熱器
我冇買呢樣，但我聽身邊所有買過嘅親戚朋友都話好後悔買咗，因為其實濕紙巾又唔係真係好凍，同埋我哋抹pat pat都係用棉花多，咁用暖水濕棉花就可以喇，唔使買部機。
喺屋企我都好少用濕紙巾幫唯b抹pat pat，因為濕紙巾唔係100%純水，有其他物質，長期用對皮膚都唔太好，尤其是初生bb嘅皮膚咁幼嫩，多用天然產品好啲。初時我哋都係每次用就拎個盆裝暖水，再濕啲乾棉花抹pat pat，但之後想方便大家，就喺$12店買咗呢個膠盒，放一大疊乾棉花入去，加食水，等啲棉花慢慢吸水後，用力壓走多餘嘅水份就得，用法就好似濕紙巾咁，每次取一片。
3. 學步車
買過一部學步車俾唯b，佢嘅興趣不大，而且未學識行嘅幼兒推住果部車係未必識平衡，反而無助學行。佢識行絕對唔係靠部車，其實只要有圍欄，佢就會扶住慢慢企起身，再慢慢學行。
4. 防跌枕
（網上圖片）
防跌枕目的係防止bb向後跌撞到後腦，不過bb係唔會咁聽話一跌就只向後跌，佢哋跌嘅方向可以係向係左／右／前／後，所以如果係初學企同行，俾佢留喺軟墊上，跌都唔怕撞擊後腦，好過要佢揹住個枕頭嘛。
5. 沖涼網
（網上圖片）
本身我都以為同初生唯b沖涼會用到，但其實有個網喺度，係更加阻礙沖涼。首先，我唔會放個bb自己一個瞓喺網度（好似啲廣告相咁），因為佢個身要浸住少少暖水先唔凍；第二，有個網喺度，我幫佢轉身洗背嘅話，要抱住佢嘅同時又要拎走個網，唔方便。所以，我只係用過一次咁多。
每件產品嘅出現當然都有佢嘅用途嘅，而以上都只係我個人同身邊親友嘅意見，唔係話以上嘅產品完全冇用，只係可以用其他嘢代替或甚至慳返，希望幫大家慳返少少錢同位啦
唯媽
唯媽大學時期修讀英國文學，現是一名在職媽媽、半個文字工作者，希望以語文教育和感染唯B，做個不只知識，更加知情知性的人。
Facebook Page：https://www.facebook.com/WePlaynLearn/
Instagram: https://www.instagram.com/klychu/
更多唯媽的Blog：http://bit.ly/2iUSsBX
