唔知係咪真係男女有別，二哥自出世起都特別大汗，就算阿哥同妹妹同一時間沖涼，阿妹沖完涼香噴噴，令人忍唔住想錫多幾啖。阿哥呢？一哄個頭埋去，即刻聞到一陣酸餿的「佬味」，好似幾日無沖涼咁。

二哥初生時好多頭泥，除咗頭，頸，耳背都有少少，所以先會成日有陣酸臭臭。

頭部其實是脂溢性皮膚炎，於初生BB常出現於皮脂腺較多的部位，例如：頭部、前額、面頰、眼眉、耳朵、腋下、腹部和大腿間的皺摺部位。是一小片一小片泥黃色的皮膜，一般BB慢慢會自動脫淨，但如果護理得唔好，亦容易誘發成BB濕疹。

當發現BB有頭泥，千祈唔好責怪工人姐姐（或幫BB沖涼的大人）點解唔幫BB捽走啲頭泥。初生BB皮膚好幼嫩，絕對不適宜用梘性重的沐浴露以及大力清潔。

對付頭泥，要有愛心和耐性。以下是我家人當時的步驟：

1）用少許橄欖油溫柔地按摩頭皮，（或其他BB按摩油應該都可以，不過我費事買）

2）然後先沖涼，讓橄欖油留在頭皮上一會。

3）沖涼後先包好BB防著涼，再用BB沐浴露洗去頭皮上的橄欖油，

4）再用毛巾將頭上的水印幹（唔係抺，係印乾）

BB頭泥唔會洗一次就無曬咁神奇，所以唔需要急住捽甩佢。反而皮膚保濕之餘亦要保持乾爽好重要。

而我家二哥，記憶中都好似差不多半歲，過完夏天才開始脫離臭男人行列，變番香噴噴BB。

Annie Lee－香港營養師學會 (HKNS) 認可營養師 

家有三寶，一囡和一對龍鳳胎

任職營養師主管多年，生Bsss後轉為私人執業營養師。

身兼多職，撰寫多個健康專欄，舉辦健康講座，為人客提供飲食營養建議，喜歡分享貼地的母嬰和育兒的經驗及營養資訊。

Facebook Page: https://www.facebook.com/AnnieLeeDiet/

更多營養師 Annie Lee的Blog：http://bit.ly/2v3H7zR