人人話女性天生獨有母性。其實作為新手媽咪，對好多初生兒的事情一樣毫無經驗，跟母性無關。

懷胎40週，就算曾幻想無數次出世後的情況，到真正實戰又是另一境況，初生階段最容易精神繃緊。孕後媽咪的身心其實非常需要休養，此時媽咪最需要學懂的，是開口揾幫手。

誰是新手媽咪的最強幫手？
照顧初生兒的生活節奏，是混亂與疲累的。

如果3年前你問我，可能我會答陪月姨姨、自己媽媽或奶奶。但此時此刻，我好肯定，是當年看似雞手鴨腳，有外號「豬隊友」的新手爸爸！

雖然身邊好多新手爸爸都被評為阻手阻腳/冷眼旁觀/個BB佢無份。。。但識用呢對「豬」手，除了令你能喘口氣，那互相扶持還是一種無言的感激和愛，是支持這個新家庭組合的樁柱。

代入「豬隊友」的角度看初生階段
當你每日百感交雜時，其實當新手爸爸都不簡單。媽咪，當你可以隔住肚皮感受新生命，新手爸爸是出世後才真正第一次接觸。如果是場龜兔賽跑，新手爸爸就是那隻龜，一起步就慢了40週。

初生兒日程大家見到已頭暈，再望見你如此老練，自己出手冒住被人話「叫你做少少野都越幫越忙」，倒不如樂得做個旁觀者！結果又令你暗中不爽，「自己已攰到死，老公就坐埋一邊！」簡直兩面不是人。

給爸爸重要的位置

moOmoO未出世時，我跟老公已分工。我管「入」 - 餵哺母乳，他管「出」 - 換尿片，還講笑話是衛生決定。由最初雞手鴨腳，轉眼6個月，老公就變成「尿片專家」，除動作快而準，對各品牌好壞更一清二楚，連麻媽都靠他通知邊度買最平！

後來，尿片越用越少，就同老公傾轉型為「沖涼爸爸」。有時廁所傳來求助哭聲，有時細聲講大聲笑，偶然麻媽做替工，moOmoO會表演沖涼時爸爸教她的雜技。

每一個階段，我倆各有其位，誰都不替代誰。這個跟小朋友的ME time，是建立感情的時間，讓關係與經驗一天一點累積，令新手爸爸更確認自己「爸爸」這身份。

讓爸爸跟隨自己的節奏 
moOmoO 3個月大時，每晚半夜總會醒，我同老公會嘗試輪流哄睡。老公每次都顯得不自然，moOmoO總是一直哭，轉到我手裏，幾分鐘就瞓番。有一晚，老公吐了一句：「佢唔鍾意我，就算跟你方法去抱，佢都唔鍾意！總之就係不鍾意我！」沮喪到一個點，像患上產後抑鬱症 

當時我答：「你唔需要學我，應該揾一個自己同女女覺得舒服嘅方法。」後來，爸爸默默地真找出「自己的方法」，有一段時間哄睡時，他比麻媽還要熟手！

媽咪，別不自覺變「緊張大師」，見身邊人不懂，就要求他人跟自己一套，甚至搶住做。其實找出自己跟baby相處的節奏，每個人都要時間，baby也自會適應，家庭關係就更長久。

新手媽媽，別再幻想老公天生能主動以9秒9姿態湊B。當你見到老公雞手鴨腳時，請給他多點「心」- 耐心、信心、放心，別令「豬隊友」無癮行開。養育一個新手爸爸和養baby一樣，過程中難免有無奈和激死，但相信老公終有一天能擔起更多，走得更遠！

故事最後，龜還是可以勝過兔！

【MOoMOo麻媽】

80後金牛座媽媽，育有一名z世代金牛座女兒。二人性格同樣愛吃愛玩，但亦相當固執。

麻媽率性勇敢，女鵝細膩樂天。每天於美食、教養及搗蛋中徘徊，希望透過文字跟同路的你互相鼓勵，啟發養育正能量。

Facebook Page - https://www.facebook.com/mrsandmissyMOoMoO/

更多MOoMOo麻媽的Blog：http://bit.ly/2v3KAyr