我地一直都有同Alfred玩伏匿匿，總覺得佢玩伏匿匿時特別可愛，因為每次都會好容易發現到佢XDDD。
原來佢咁易比人發現係有原因呀，呢個係一種「自我中心」未脫離嘅表現。喺6、7歲前都會以為自己匿埋得好好，但其實佢只係掩埋自己雙眼，其他身體部位早已露餡了！XDDDD
我地真係好享受Alfred仲未匿得好好嘅階段，仲係好享受搵佢時要忍住唔笑但又要扮睇佢唔到咁大叫「Alfred喺邊度呀？」、「您匿得咁埋，媽咪搵唔到您添！」。每次同佢玩伏匿匿，我同爸爸都覺得佢好天真，好傻，我同爸爸都會相對而笑咁講「咁就叫匿埋咗？ＸＤ」，更會影底佢令我地哭笑不得嘅匿埋情況，而且每次玩完，大家都會開懷大笑！
爸爸甚至堅持每晚都會同佢玩伏匿匿，因為爸爸知道，個仔大個咗之後，就未必會咁樣同我地玩呀啦。:((
原來簡單嘅伏匿匿遊戲都係一個好好嘅親子活動，而且每次見到個仔洗出一招「您睇我唔到，睇我唔到」。我同爸爸都會好落力咁配合陪佢玩，因為我地唔忍心咁快拆穿佢，因為我地知道，您呢個「睇我唔到」嘅表現，係代表您仲稚嫩，我地更要好好珍惜您仲樂意同我地咁玩嘅每個時刻呀！
大家又有無影底一啲「您睇我唔到」嘅珍貴相呀？
===================================
（以上資料更新至撰文當日）
聯絡電郵： alfredbb325@gmail.com
最近開始玩IG，歡迎追縱：allaboutalfred
最近開始玩YouTube，歡迎追縱： allaboutalfred
