生完BB，爸爸媽媽正式進入緊急狀態，日夜擔心佢食唔飽、凍親、瞓唔好、便便唔知夠唔夠等...  其實產後嘅媽媽，錫住自己都好重要！

1. 關於瘦身

生完B大左一個碼，連鏡都唔想照！雖然內心好想快D「返家鄉」(返回懷孕前體重)，但坐月絕不能節食，生完又唔可以咁快做運動減肥（順產要在坐月後；剖腹產約2-4個月後，視乎傷口癒合和醫生建議）。據說產後6個月係修身黃金期，所以應該好好把握呢段時間，讓修身過程事半功倍！

其實雪梨媽媽就係一開始太鬆懈，亦因為餵人奶所以食量很驚人，一直很難瘦下去… 終於食左一排低卡路里餐加上運動，喺產後10個月先「望見家鄉」。(懷孕前與懷孕高峰的體重差距是40磅呢…) 另外好後悔無跟「束身療法」產後乖乖戴腰封，肚腩還是鬆鬆的，即使體重再減亦很難恢復…(哭)

2. 關於身體：關節、腹肌、胸部、會陰
即使沒有體重增加的瘦媽，也有好幾個身體部位要特別留意！產前好多媽媽都好有心機上產前運動班，但生完太忙就無乜理會產後運動。其實，懷孕時身體會釋出「鬆弛素」，令關節同骨盆放鬆以預備生產，而腹肌亦因日漸長大嘅肚肚令佢「無得留低」.... 所以產後要循序漸進地鍛練肌肉，可以加快身體恢復，減低媽媽受傷嘅機會。

另外，做女人咁多年，都係成為人奶媽先要咁著緊阿囡嘅「米飯班主」，亦因為試過塞乳腺的痛仲試過塞到發燒，發現胸部護理的重要性遠高於外觀而已。無餵人奶後，更換了調整性較強的內衣，加上每晚沖涼後簡單按摩，短期內已經見到成效，自己都會開心番！

亦有些媽媽因懷孕時膀胱受壓，或自然生產時的撕裂，產後會有「漏尿」的問題，所以產後要keep住做「會陰運動」(最簡單係坐低然後做「忍shu shu」時嘅肌肉收緊)。

3. 食療及補充劑

生產後媽媽體內嘅鈣質同骨膠原流失好似倒水咁！除左從飲食著手(可試試上篇推介嘅鮮奶燉花膠)，亦可以按需要食supplements補充番。

4. 好好照顧自己的情緒

由懷孕開始，身體嘅荷爾蒙不斷出現變化，為新生命做準備，所以情緒波動好正常(好似keep住m到咁…)。加上照顧New born無得瞓、擔心呢樣嗰樣、坐月減少外出，更容易令產後媽媽情緒低落。

要知道，一個開心嘅媽媽，先有開心嘅寶寶呢～ 如果察覺情緒太低落，不妨短暫搵陪月/家人/老公湊住BB三兩個鐘，俾自己take a break，外出行個圈、破戒食少少自己鐘意嘅野食(食坐月餐的確好悶)，或者做下自己鐘意嘅事。坐月雖然重要，但情緒一樣要好好照顧！關於產婦「入風」可以參考返之前嘅文章《打破迷思：坐月唔可以沖涼？》。

【Suetlei Mama . 雪梨媽媽】

全職工作 . 偶爾要出差 . Part-time讀書 . 80後媽媽一名

大學主修傳理，畢業後跑到慈善機構工作，生活工作兩忙，但發現原來離不開文字。自籌備婚禮開始寫Blog，內容由結婚到新婚生活、陀B、湊B、帶B旅行、育兒心得等。

【生活哲學】

生活再忙，都想記下孩子的成長點滴。

荷包再緊，都想買盡最抵最好的東西(主要)俾囡囡。

Facebook Page - https://www.facebook.com/suetleimama/

婚禮籌備 · 陀B湊B - http://wow.esdlife.com/suetlei

旅遊Blogs - http://hutchgoer.com/author/suetlei

Contact: suetleimama@gmail.com

更多雪梨媽媽的Blog：http://bit.ly/2uSfb2z