自问自己真系一只牛魔王，对牛情有独钟！近年改变咗煎牛扒慨做法，用仿熟成慨模式去试试，出来效果又觉得唔错喎。人总想进步，因为一向喜欢食比较生medium rare，但每次煎完出来即刻急不及待切嚟食，所以只碟一定好似血流成河咁，好肉酸！不过而家唔会㗎喇，切开都好靓仔，好满意！

自从上两年知道dry aged beef（干式熟成牛肉） 慨处理过程（意思系将牛肉喺指定温度慨地方吊起风干几个礼拜），熟成处理过程当然有一定慨技术，目的系将牛肉慨肉汁浓缩，浓缩之后牛肉味就自然会更加重，更加突出。所以胆粗粗咁用呢个原理，响屋企试下自己做！哈哈效果唔错几满意！

做法好简单：

1. 将牛扒用毛巾印干净，用蒸隔晾起，放入雪柜雪两日，原理系利用雪柜慨低温同风扇位仿效风干，集中牛扒肉味！

2. 两日后拎出牛扒，放于室温约20－30分钟，就可以煎了。如果厚1吋多啲慨牛扒，我会用大火煎封4边大约10几20秒，然后再次重复做多一次，然后用锡纸包住等约5分钟，先至开始切开。

小提示：原来啱啱煎好慨牛扒一切会渗出大量血水，令到肉质收紧, 所以要等牛扒＂休息＂一阵，等肉质放松返，血水被自己肉质纤维吸收返之后，就唔会一切开就血淋淋啦！