今年真系好多时间做咗空中飞人，几乎一星期飞一次；期间不停工作，开会，拍摄⋯⋯有时真系连停落嚟饮水慨时间都无，成个人又干又躁。咁慨生活习惯下，皮肤又点会好？！记得有次拍摄完之后我哋摄影师私底下嚟问我系唔系病咗，因为面青口唇白，个妆又浮粉。嗰一刻我就知道，啊！～我要开始注意健康同养生啦！

之前都有食开维他命同一啲补充品，免疫力系有增强但其实唔会真系感到身体同面色有好大转变。上年年尾试咗北京同仁堂慨白凤丸，话有「中药美容」功效，可以打造红润美肌。的确由细到大都听到广告话白凤丸系女士健康良伴，所以就抱住即管试试慨心态食左几个月。到底白凤丸系咩呢？我都研究左一阵。成份以乌鸡、黄芪、白芍、丹参、人参、当归、熟地黄、鹿角霜等药材制成；补气、养血、调经，有效改善女性周期不适，手脚冰冷，滋补养颜。

哈哈！再简单啲咁讲就系一种女性保健产品，主张固本培元美容法，调理好体内健康，好好滋补先可以由内至外散发美丽。我自己食左几个月之后，就觉得月事嚟慨时候无之前咁唔舒服，同埋苍白慨面色有好返少少。当然唔系话唔驶化妆出街咁夸张啦，但起码睇落个咀唇有返啲粉红色而唔系苍白一片。

有好多唔同慨品牌都有出白凤丸，之前都有出过一啲报导话有啲白凤丸验出铅超标８倍，卫生署呼吁回收。所以，如果大家有兴趣想买白凤丸的话，记得买信誉良好慨牌子喔！