咳呢家嘢听到都惊惊，好辛苦！喉咙气管一齐痕，完全控制唔到自己不断狂咳，每次都咳到个肺甩咗出嚟！虽然睇完医生好返8、9成，但都总系拖住条尾。西药真系超燥，又令人口淡淡！不过自小屋企有几款糖水，针对余下慨两声咳特别有效！我每次都无需要继续食药，如果仲有小小未断尾，就系靠其中一款糖水【杏汁炖花胶】滋润下条气管，就会好快好返㗎啦！

呢个糖水对于我简直万试万灵！长大后就十分好奇，所以翻查一下爸爸慨中医书！ 原来杏仁(南北杏)有降气行氮、除风散寒、治咳嗽、风寒犯肺、肺气不利而久咳、平喘促、润燥通肠之功效。据医书所说龙皇杏即是南杏，又名甜杏仁，比北杏大；北杏虽然带苦涩，但效力比南杏较强，通常都会以北杏入药。 两者都含有丰富蛋白质、植物脂肪杏仁油，对滋润气管、干燥皮肤都好有帮助！

睇完之后完全明白晒，丰富慨杏仁油再加上滋阴花胶，食完除左止咳之外，皮肤都变得光泽透亮啦！

【杏汁炖花胶】食谱

材料：

龙皇杏（南杏）5両（洗干净浸过夜，水留起备用）

北杏1両（洗干净浸过夜，水留起备用)

(以上水份约共700－800ml）

浸发好的花胶适量

冰糖按个人喜好

做法：

1. 将2种杏仁加水用搅拌器打烂，如果搅拌器没有隔渣功能，可以用鱼汤袋隔渣！用手出力将杏仁汁揸出。

2. 重复将杏仁汁同渣搅拌2－3次，再用手用力揸出汁液。

3. 最后用密筲箕隔一次以免有杏仁碎影响口感。之后用中火加入冰糖放入花胶煮热，然后放入炖盅炖30-45分钟即可！

小贴士：如果觉得炖花胶繁复，建议煮滚杏仁茶后加入蛋白同煮，一样滋味养生。