琴日嘅天氣真係可以用過山車嚟形容, 朝早至中午又暖又潮濕, 跟住, 中午過後, 氣溫開始降溫. 現在只有7度. 今日開始又要過番'扎糭'嘅日子. 試問依啲咁嘅天氣, 點會唔多人病呀? 所以大家一定要好好保重身體.

這麼凍嘅天氣點可以冇米器架? 電飯煲係時候又出場啦~~~~簡單又快捷係人都鍾意啦! 只需配上普通灼菜, 已經好滿足同健康.

鴛鴦腸瑤柱蝦乾焗飯 (電飯煲版)

材料:

臘腸 1條

潤腸 1條

蝦乾 10隻

乾元貝 (大) 2隻或 乾元貝 (小) 8粒

米 2杯

薑絲 適量

做法:

1. 蝦乾用熱水浸軟, 浸蝦乾水留起備用.

2. 乾元貝用熱水浸軟撕成細絲或用攪拌機打成細絲, 浸乾元貝水留起備用.

3. 臘腸及潤腸洗淨, 切片備用. 薑刨皮切絲.

4. 米洗淨落飯煲內, 將浸蝦乾水及浸乾元貝水倒入飯煲內. (水份係平時正常的份量) 放入薑絲, 按正常煮飯功能.

5. 待飯煲水米水稍微滾起或飯煲蒸氣隔, 見稍微有蒸氣, 再加入剩餘所有材料放入煲内米飯面上, 然後關上煲蓋直至飯熟, 飯熟後唔好開蓋再焗10分鐘. 即成.